Усы жылдың 2-март күни Бердақ атындағы Қарақалпақ мәмлекетлик университетиниң мәжилислер залында Өзбекстан Экологиялық партиясы Қарақалпақстан Республикасы аймақлық партия шөлкеми конференциясы болып өтти.

Конференцияда экология ҳәм денсаўлықты сақлаў тараўында жумыс алып барып атырған шөлкемлер, жәмийетшилик шөлкемлердиң ўәкиллери, алымлар ҳәм экспертлер, билимлендириў мәкемелери  профессор-оқытыўшылары, ғалаба хабар қураллары ҳәм кең жәмийетшилик ўәкиллери қатнасты.

Илажды Өзбекстан Экологиялық ҳәрекети Қарақалпақстан аймақлық бөлиминиң баслығы А.Бегимова ашып берди.

Онда Өзбекстан Экологиялық партиясы Қарақалпақстан Республикасы аймақлық партия шөлкеми Кенеси ҳәм аймақлық партия шөлкеми Бақлаў-ревизия комиссиясы ағзаларын сайлаў, сондай-ақ, Өзбекстан Экологиялық партиясы II съездына делегатлар сайлаў сыяқлы шөлкемлестириў мәселелери көрип шығылды.

Өзбекстан Республикасы Президентиниң 2017-жыл 22-декaбрдеги Олий Мажлиске Мүрәжатнамасында белгиленген партияларара бәсекини тәмийинлеў, бәрше сиясий субъектлер ушын тең шәраятлар жаратыў, парламент ролин күшейтиў бойынша әҳмийетли ўазыйпалар орынланыўын тәмийинлеў мақсетинде усы жылдың 8-январь күни Өзбекстан Экологиялық партиясы дүзилди ҳәм 22-январь күни Өзбекстан Республикасы Әдиллик  министрлиги тәрепинен мәмлекетлик дизимге алынды.

Конференцияда Өзбекстан Республикасы Олий Мажлис нызамшылық палаласы спикериниң орынбасары, Өзбекстан Экологиялық партиясы Орайлық Кеңеси атқарыў комитетиниң баслығы Б.Алиханов қатнасыўшыларға Өзбекстан Экологиялық партиясы Қарақалпақстан Республикасы, ўәлаятлар ҳәм Ташкент қалалық аймақлық партия шөлкемлерин дүзиў бойынша Партия Орайлық Кеңеси тәрепинен тийисли қарар ҳәм усы қарарды әмелге асырыў бойынша  партия алдында турған ўазыйпалар ҳаққында мағлыўматлар берип өтти.

Сондай-ақ, пленумда Өзбекстан Экологиялық партиясы искерлиги менен байланыслы ҳүжжетлер: “Өзбекстан Экологиялық партиясы ағзалығына қабыл етиў, партия ағзаларын есапқа алыў ҳәм партия ағзалығынан шығарыў ҳаққында”ғы, “Өзбекстан Экологиялық партиясы ағзалық төлемлерин төлеў ҳәм олардың есабын алып барыў тәртиби”, “Өзбекстан Экологиялық партиясы Орайлық Кеңеси атқарыў комитети канцеляриясы, аймақлық партия шөлкемлери хызметкерлериниң ис ҳақын төлеў, мийнетин баҳалаў ҳәм социаллық қоллап-қуўатлаў системасы ҳаққында”ғы Нызамлары ҳәм “Өзбекстан Экологиялық партиясының ишки бақлаў-ревизия хызмети ҳаққында”ғы Нызам жойбары, “Өзбекстан Экологиялық партиясы жумыс регламенти” таярланды ҳәм Өзбекстан Экологиялық партиясы  Орайлық Кеңес пленумында тастыйықланғанлығы ҳәм усы ҳужжетлер келещекте партия ҳәм де оның аймақлық шөлкемлери жумысын  тәртипке салыўға қаратылғанлығы ҳаққында  мағлыўматлар берилди.

Илажда Өзбекстан Экологиялық партиясы Қарақалпақстан Республикасы аймақлық партия шөлкеми Кенеси ағзалары аймақлық партия шөлкеми Бақлаў-ревизия комиссиясы ағзалары сайланди. Сондай-ақ, Өзбекстан Экологиялық партиясы Қарақалпақстан Республикасы аймақлық партия шөлкеминен Өзбекстан Экологиялық партиясы II съездына 16  делегатлар сайлап алынды.

Әлбетте, экологиялық сиясий партияның тийкарғы итибары қоршаған орталықты қорғаў мәмлекет ҳәр бир пуқарасының улыўмалық жумысы болыўына қаратылады. Және, мәмлекетте турақлы  раўажланыў мақсетлерине ерисиў, халық ушын қолайлы экологиялық шәраят жаратыў ҳәм тәбиятты сақлаўға жәмийеттиң бәрше күшлерин қаратыў, экологиялық мәденият дәрежесин көтериў, Арал теңизи қурыўы нәтийжесинде пайда болған экологиялық ҳәм социаллық машқалаларды шешиў, Арал теңизи кризисиниң кери ақыбетлерин жумсартыў сыяқлы ўазыйпалар усылар қатарынан.

Конференцияда көрип шығылған бәрше мәселелер бойынша тийисли қарарлар қабыл етилди.

Усы күнниң өзинде, Қарақалпақстан Республикасы аймақлық партия шөлкеми Кеңеси жыйналысы болып өтти ҳәм жыйналыста Кеңестиң атқарыў комитети ағзалары, оның баслығы ҳәм орынбасарлары сайлап алынды.

ҚМУ Баспасөз хызмети.