Jańa Ózbekstannıń rawajlanıwında ilimpaz hayal-qızlardıń ornı

Húrmetli

Prezidentimizdiń baslaması menen mámleketimizde hayal-qızlardı hár tárepleme qollap-quwatlaw olardıń sociallıq-ekonomikalıq hám siyasiy belsendiligin jetilistiriw, ilimiy iskerlikke baǵdarlaw, bántligin támiyinlew, isbilermenlikke tartıw máselesinde keń kólemli reformalar ámelge asırılmaqta.

Birlesken Milletler Shólkemi Bas Assambleyasınıń 2015-jıl 22-dekabr kúngi 70-sessiyasında 11-fevral «Ilim hám bilimlendiriw tarawındaǵı hayallar hám qızlar kúni» sıpatında rásmiy belgilenip, 2016 jıldan baslap dúnyanıń kóplegen mámleketlerinde 11-fevral keń túrde nıshanlanıp kelmekte.

Usı sáne múnásibeti menen Berdaq atındaǵı Qaraqalpaq mámleketlik universiteti hayal-qızlar keńesi tárepinen 11-fevral «Ilim hám bilimlendiriw tarawındaǵı hayallar hám qızlar kúni»ne arnap «Ilimpaz hayal-qızlardı qádirleyik» uranı astında bayram ilaji ótkerildi.

Bayram ilajdı universitetimizdiń Jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov hám hayal-qızlar máseleleri boyınsha rektor másláhátshisi I.Seytnazarovalar ashıp berdi.

Universitetimizde ilim-bililendiriw tarawında izertlew jumısların alıp barǵan, kóplegen shákirtlerdiń ádiwli ustazı dárejesine jetken, elede ilim jolında ayanbay miynet etip kiyatırǵan bir qatar ilimpaz hayal-qızlarımız búgingi bayram ilajımızdıń ádiwli miymanı boldı.

Elizaveta Qutıbaeva  – QMU, yuridika ilimleri doktorı, professor, Alima Berdimuratova  – QMU, filosofiya ilimleri doktorı, professor, Roza Ballieva -QMU, tariyx ilimleri doktorı, professor hám tariyx fakulteti 4-kurs studenti, Prezident stependiyası iyesi Xanna Utemuratovalar óz miynet jolı hám qolǵa kirgizgen tabısları haqqında sóz etti. Student qızlarımız ózleriniń qızıqtırǵan sorawlarına juwaplar aldı.

D.Sabirova

Ximiya-texnologiya fakulteti studenti