TÁLIM SAPASIN ASÍRÍW JAŃA ÓZBEKSTAN RAWAJLANÍWÍNÍŃ BIRDEN-BIR TUWRÍ JOLÍ

Ózbekstan Respublikası Prezidenti Shavkat Mirziyoev Oliy májlis hám Ózbekstan xalqına múrájatnamasında «Tálim sapasın asırıw – Jańa Ózbekstan rawajlanıwınıń birden-bir tuwrı jolı» bolıp tabıladı – dep aytqan edi.

Haqıyqatında da mámleketti rawajlanǵan mámleketler qatarına alıp shıǵıw ushın jetik qánigelerdi jetistiriwde tálim sapasın asırıw mámleketimizdiń kún tártibinde turǵan aktual máselelerden biri bolıp tabıladı. Sonlıqtan, Húrmetli Prezidentimiz múrájatnamada tálimdi «Jańa Ózbekstan ushın eń úlken investiciya» dep aytıp ótkeni tereń strategiyalıq áhmiyetke iye.

Sapalı tálimdi ámelge asırıw hám joqarı nátiyjelerge erisiw tek taraw qánigeleriniń emes, ulıwma jámiyettiń hár bir aǵzasınan úlken juwapkershilik hám de belsendilikti talap etedi.  Múrájatnamada oqıtıwshı – pedagoglar abıroyın jáne de kóteriw, olardıń ar namısın qorǵawdı mámleket Konstituciyasında belgilew zárúrligi aytıp ótkeni itibarǵa ılayıq. Sonıń menen birge, mámleket Basshısı tálim-tárbiya keń jámiyetshiliktiń ámeliy háreketine aylanıwı kerek, degen edi.

Múrájatnamada aytıp ótken zárúrli táreplerden taǵı biri – bul 2023-jıldan mektep tálimin xalıq-aralıq tálim programmaları tiykarında pútkilley reformalaw bolıp tabıladı. Buǵan baylanıslı jańa sabaqlıqlar islep shıǵılıwı, aldıńǵı tálim standartları hám metodikaların engiziw ushın ilimiy institut hám laboratoriyalar shólkemlestiriw aytıp ótildi.

Prezident óz sózinde tálim sapası tikkeley pitkeriwshilerdiń zamanagóy ilimiy tájriybe hám kásip-óner kónlikpesin ıyelewi menen tıǵız baylanıslı ekenin aytıp ótti. Sonday-aq, intalı jaslardı qollap-quwatlawdı keńeytiw maqsetinde « Ximiya sanaatı, elektrotexnika, transport hám energetika tarawlarında abıraylı xalıq – aralıq shólkemler menen birge, óz aldına bólek Injenerlik mektepleri ashıladı. Bul sistema bizde házirge shekem bolmaǵan. Qısqasha aytqanda, jańa zaman injenerlerin tayarlaw sistemasın jaratamız» – dedi Prezident.

Injenerlik mekteplerdiń ashılıwı jaslarımız ushın zamanagóy kásip ónerlerdi iyelewine keń múmkinshilikler jaratadı.

Házirgi waqıtta, joqarı oqıw ornıları ózlerine qızıǵıwshılıq tuwdırıw ushın ózleri háreket etiwi, atap aytqanda, rektorlar, professor – oqıtıwshılar bul processlerde belsendi bolıwı, zamanagóy, aldıńǵı oqıtıw usılların engiziwi kerekligin aytıp ótti.

Juwmaqlap aytqanda, aldımızǵa qoyılǵan maqsetler anıq. Olardı ámelge asırıwda universitetimizdegi hár bir professor oqıtıwshı hadal hám kásipke sadıqlıq menen miynet etiwi talap etiledi. Onıń ushın eskishe kóz qaraslardan waz keship, aldınǵa háreket etiwimiz, sıpatlı tálim alıp barıwımız ushın óz ústimizde tereń islewimiz, bilimlerimizdi hár tárepleme jetilistirip barıwımız kerek.

Uzakbergenova Zamira Dosnazarovna «Organikalıq hám organikalıq emes ximiya» kafedrası baslıgı, docent