QMUda «Jańa ózbekstan -jańa dáwir qızları» uranı astında «dáwir qızları» tańlawı bolıp ótti

Usı jıldıń 13-14-mart kúnleri Berdaq atındaǵı Qaraqalpaq mámleketlik universitetinde student qızlar arasında «Jańa Ózbekstan -jańa dáwir qızları» uranı astında «dáwir qızları» tańlawı bolıp ótti. Onda barlıq fakultetlerden student qızlar óz ónerleri menen qatnastı. Dáslep tańlawdı universitetimizdiń, jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov ashıp berdi hám bárshe qatnasıwshılarǵa áwmet tiledi. Tańlawdı ótkeriwden tiykarǵı maqset student qızlardıń oqıwda hám jámiyetlik jumıslarda belsendiligin arttırıw, olardı Ana-Watanǵa sadıqlıq, ruwxında tárbiyalaw, sonday-aq, shańaraqqa, keleshek turmısqa tayarlaw menen birge, ózleri tańlaǵan qánigeliklerine súyispenshilik hám maqtanısh sezimlerin arttırıw, milliy úrp-ádet dástúrlerimizdi, ádep-ikramlılıq, iybelilik sıyaqlı pazıyletlerin jetilistiriw bolıp tabıladı. Tórt shártten ibarat bolǵan tańlaw óz-ara bellesiwlerge bay boldı. Eki kún dawam etken tańlawdıń dáslepki kúngi nátiyjeler boyınsha 1-orındı Dene mádeniyatı «Qumar ana qızları» komandası, 2-orın Ximiya-texnologiya fakulteti «Gulayım qızları» komandası, 3-orın Tariyx fakultetiniń «Gerodot qızları» komandası iyeledi. Jeńimpaz komandalar shólkemlestiriwshiler tárepinen xoshametlendi.