Jaslar arasında kiberjınayatshılıqtıń aldın alıw máselesine arnalǵan dógerek sáwbeti bolıp ótti

Búgingi kúnde globallıq informaciyalıq maydanda kiber ortalıq penen baylanıslı bolǵan jańadan-jańa qáwipler payda bolmaqta. Sonlıqtan, virtual álemdegi hújimlerden qorǵanıw máselesi dúnya jámiyetshiligin tereń oyǵa salmaqta.

Ximiya-texnologiya fakultetinde «Biz, jaslar kiberjınayatshılıqqa qarsımız!» súreni tiykarında shólkemlestirilgen dógerek sáwbetinde jaslar arasında kiberjınayatlardıń aldın alıw hám oǵan qarsı gúresiw máselesi dodalandı.

Ilajǵa QR Ishki isler ministrligi kiberqáwipsizlik bólim baslıģı, mayor D. Seytmuratov, Nókis Áskeriy sudınıń sudiya járdemshisi R. Nurniyazov, universitet profilaktikalıq inspektorı, kapitan I. Erejepov, Jaslar máseleleri boyınsha dekan orınbasarı Ğ. Sultanov, tyutorları, student-jaslar qatnastı.

Dógerek sáwbetinde atap ótilgenindey, dúnya boylap hár jılı 500 millionnan aslam kiber hújimler shólkemlestiriledi. Ózbekstanda da sońǵı jıllarda usı túrdegi jınayatlardıń sanı kóbeyip, bank-qarjı operaciyaları arqalı ózgelerdiń plastik kartasındaǵı qarjılardı ózlestiriw, zıyanlı viruslar tarqatıw, qumar hám táwekelshilikke tiykarlanǵan onlayn oyınlar, diniy dogmatizmge baǵdarlanǵan informaciyalıq hújimler, onlayn sawda maydanındaǵı aldawshılıqlar sıyaqlı jaǵdaylar jiyi ushıraspaqta.

Ashınarlı tárepi, informaciyalıq texnologiyalar járdeminde huqıqbuzarlıq hám jınayatqa qol urǵan adamlardıń arasında jaslar kópshilikti quraydı. Respublikamızda virtual álemdegi nızam buzılıwshılıqtıń basım kópshiligi 16-23 jas aralıǵındaǵı jaslar tárepinen ámelge asırılmaqta. Bunnan kórinip turǵanınday, kiberqáwipsizlikti támiyinlew máselesi búgin hár qashanǵıdan da áhmiyetli bolıp tabıladı.

Ilajda qánigeler tárepinen jaslar arasında bunday jaǵdaylardıń aldın alıw baǵdarında ámelge asırılıp atırǵan jumıslar, kiberjınayatshılıqtıń huqıqıy aqıbetleri haqqında maǵlıwmatlar berilip, aldaǵı birgelikte islenetuǵın jumıslar belgilep alındı.

Studentler kún tártibindegi másele boyınsha ózlerin qızıqtırǵan sorawlarǵa juwap aldı.

Kanalǵa aǵza bolıw

https://t.me/ximiya_texnologiyafakulteti