Ustazlar Nókis «Temurbekler mektebi» áskeriy-akademiyalıq liceyinde

2023-jıl 14-fevral kúni Nókis «Temurbekler mektebi» áskeriy-akademiyalıq liceyinde oqıwshı hám oqıtıwshılar menen universitettiń Ximiya-texnologiya fakulteti dekanı B.Nurımbetov hám organikalıq hám organikalıq emes ximiya kafedrası docenti B.Táńirbergenovlar menen ushırasıw bolıp ótti.

Ushırasıwda B.Nurımbetov licey oqıwshılarına Universitet hám Ximiya-texnologiya fakulteti haqqında, fakultette iskerlik alıp barıp atırǵan professor-oqıtıwshılar hám olardıń ilimiy isleri haqqında, ximiya pániniń islep shıǵarıwdaǵı tutqan ornı, Respublikamızdaǵı ximiyalıq islep shıǵarıw kárxanaları haqqında, Respublikamızda jaylasqan kánler haqqında bir qansha maǵlıwmat berdi. Sonday-aq universitette ámelge asırılıp atırǵan ilimiy izleniwler boyınsha túsinikler berdi.

Onnan soń Bazarbay Táńirbergenov ximiya páni boyınsha tiykarǵı túsinikler hám kúndelikli ómirimizde tutqan ornı haqqında keń toqtalıp ótti. Sonıń menen bir qatarda óziniń ilimiy iskerligi haqqında seminar qatnasıwshıları menen bólisti. Ushırasıw dawamında oqıwshılar ózleriniń qızıqtırǵan sorawlarına juwaplar aldı. Bazarbay Táńirbergenov óziniń jazǵan kitaplarınan oqıwshılarǵa sawǵa retinde tarqattı.

Ximiya-texnologiya fakulteti tyutorı A. Sherniyazov